الحب الشتوي

الحب اكيد ما بيعرف لا صيف ولا شتاء
ولا بيعرف غني ولا فقير
بس حبيت قلكن هالقصة القصيرة وانشالله تنال اعجابكم

احمد بيشتغل بورشة للساعة 6 وبيطلع دغري ليشوف حبيبتو هبة عند باب الجامع الاموي الخلفي اللي عند قهوة النوفرة وخصوصا عند الدرج ....... كل يوم بيجي ما معو الا 70ليرة بيجيبتو وبيجي لعندا ركض لانو ما معو زيادة بالمصاري
وكل يوم بيلتقوا والاشواق بتزيد يوم عن التاني
اول شي بيلتقو فيه هنن العيون لحالي بتحكي عن حبن الطاهر
والعيون بتكون هي الوسيلة لحتى تلتقي الايدي يلي بتكون عم ترجف من البرد بس الرعشة بتروح وقت بيمسكو الايدين
كل مرة بيقعدو عند الدرج وبيحكو والحكي دائما بيكون مصاحب بالبخار يلي بيطلع من الفم لانو برد كتير
وهبة دائما بتكون بردانة بس احمد شهم بيضل يعطيها جاكيتو حتى لو هوي بردان بس لانو هبة معو ما بتفرق معو
وبعد الحكي حبو يتمشو شوي وطبعا عزمها على عرباية فول كانت بالحارات القديمة وطبعا الصحن ب 20 ليرة يعني صاحبنا بئا معو 30 ليرة مو مشكلة كلو فدا حبيبتو هبة
واحلى شي بيضلو يمشو وزخات من المطر عم تنزل فوق راسن وكل 5 دقائق بينفخو بايديهن لانو عنجد برد
وبيقعدو تحت الشجرة نفسا وصارت الشجرة حافظا حكاياتن كلها
ودائما في لمبة بالشارع بضل تطفي وتشعل يعني جو رائع جدا
واهالي الحارة حافظينن لانو بيمثلو الحب النقي يلي ما في منو
وبيضلو عم يمشو ويمشو لحتى يسبقن الوقت وما بيحسو فيه
بس الساعة صارت 8.5 وهبة بدها ترجع عالبيت
بيروح احمد وبيوصلها بالسرفيس طبعا هو يلي بيدفع عنها يعني بالاخير صار معو 10 ليرات بس هوي كتير مبسوط
وبالسرفيس بيقعدو بالمقعد اللي قبل الأخير وبيطلعو كل واحد منن على شباك بس اطراف الاصابع بتكون عم تغزل احلى واجمل حكايات بين عاشقين ما بيعرفو الا كلمة بحبك
طبعا احمد بينزل بيوصلها على اقرب منطقة لبيتها بس ما فيه يوصلها كتير مشان حكي اهل الحارة واهلها كمان
وقبل ما يودعها بيهمس بادنها ( حبيتك بالصيف حبيتك بالشتي ) وما بيخلص الكلمة حتى يطبع بوسة على خدها الاحمر من شدة البرد
بس هبة ما فيها تطلع بعيونو من الخجل
بعدين بيفترقو
واحمد بدو سرفيسين ليوصل على بيتو
بس بياخد سرفيس واحد والتاني بيقضيه مشي لانو معو 10 ليرات بس
وهو على الطرق بيفكر كيف كان اليوم حلو مع هبة
وكيف بدو يدبر 70 ليرة من صاحب الورشة مشان يشوف هبة بكرى
وهبة بتكون عم تعد الساعات ليجي بكرى مشان تقلو لاحمد قديش هي بتحبو ومشتاقتلو
وكل يوم في حكاية منقوشة على تاريخ الحب تعلن انو في عاشقين بدن يخلدو اسمن فيه

تسلميييييييييييي ولله حب

الله يسلمك حبي

قصة حلو عنجد الله يهينيهم ههه يسلمو